Во прилог е даден текстот на Законот за стопанските комори (.pdf)

Статут на Стопанската комора на Македонија (.pdf)

Врз основа на член 13 став 1 алинеја 1 и член 42 од Законот за стопанските комори (Службен весник на Република Македонија бр. 17/2011), Собранието на Стопанската комора на Македонија, на седницата одржана на 20.04.2011 го донесе следниот

С Т А Т У Т
на Стопанската комора на Македонија

I. ОСНОВНИ ОДРЕДБИ

Член 1

Стопанската комора на Македонија (во натамошниот текст: Комора) е деловно-стручна асоцијација, која, согласно Законот за стопанските комори, ги усогласува, застапува и штити интересите на своите членови.

Во Комората членуваат физички лица - трговски поединци и правни лица, запишани во Трговскиот регистар и Регистарот на други правни лица со седиште во Република Македонија, кои вршат трговска дејност и други субјекти запишани во Регистарот со седиште во Република Македонија, кои со својата дејност придонесуваат за унапредување на работењето на стопанството.

Член 2

Членувањето во Комората и истапувањето од неа е слободно и на доброволна основа.

Со Комората управуваат нејзините членови преку нивните претставници во здруженијата според дејности, во регионалните комори, другите облици на организирање и работење и преку избраните членови во органите на Комората.

Член 3

Комората е независна и самостојна организација, со својство на правно лице.

Комората е непрофитна организација. Доколку во работењето Комората оствари добивка по кој било основ согласно законот и овој статут, таа мора да биде употребена исклучиво за поддржување и остварување на целите и задачите заради кои е основана.

Називот на Комората гласи: Стопанска комора на Македонија. Во меѓународната комуникација Стопанската комора на Македонија го користи називот: Economic Chamber of Macedonia.

Седиштето на Комората е во Скопје, ул. Димитрие Чуповски бр. 13. .....