Катја Зајц Кејжар е редовен професор на Универзитетот во Љубљана, Факултет за економија и бизнис, и раководител на Академската единица за меѓународна економија и бизнис. Нејзините истражувачки интереси опфаќаат различни аспекти во меѓународната економија и бизнис, европската економска интеграција, во глобалните синџири на вредност, управувањето со ризик и во индустриското реструктуирање. Работела како гостински истражувач и предавач на Универзитетот во Болоња, Шангајскиот универзитет за меѓународен бизнис и економија и на Универзитетот во Антверпен, а редовно предава на Универзитетот во Ријека. Учествувала во голем број европски (Европската комисија, Жан Моне), меѓународни (ОЕЦД) и домашни словенечки проекти (АРИС, Стопанската комора на Словенија, Царинската администрација на Република Словенија, Министерството за економија, туризам и спорт, и Министерството за земјоделство, шумарство и храна).

Во моментов таа го води проектот „EUglobe – ЕУ бизнис-успех на глобалните пазари“ (Еразмус+, Европска комисија), кој има цел да го подобри капацитетот за управување со ризик на компаниите на глобалните пазари.

Ведад Халиловиќ, менаџер за извоз во „АС холдинг“ Сараево, има дипломирано на Универзитетот во Истанбул, на департманот Меѓународни односи, додека, пак, своите магистерски студии ги завршува на Трговскиот универзитет во Истанбул. Во компанијата „АС Холдинг“ тој развива планови за унапредување на извозот и учествува на светски манифестации (саеми, самити и конференции), каде што ги претставува достигнувањата на компанијата. Ведад е член на Собранието на Надворешнотрговската комора на Босна и Херцеговина и косопственик на мала трговска компанија чиј тим брои 12 лица.

Проф. д-р Јадранка Дабовиќ-Анастасовска од 2023 година е судија во Уставниот суд. Арбитер е во Постојаниот суд – Арбитража при Стопанската комора на Северна Македонија и арбитер во Постојаниот суд – Арбитража при Стопанската комора на Хрватска. Учествувала во изведувањето на наставата на повеќе предметни програми на Правниот факултет „Јустинијан Први“ во Скопје, и тоа: облигационо право, договорно право, договори на автономната трговска практика, право на интелектуална сопственост, право на индустриска сопственост, авторско право, како и основи на правото за проектни менаџери на постдипломските студии по проектен менаџмент на Факултетот за електротехника и информациски технологии и основи на правото на интелектуална сопственост на Машинскиот факултет. Автор е на повеќе универзитетски учебници, монографии и прирачници, како и на повеќе од 100 стручни и научни трудови од областа на приватното право.

Амбасадор д-р Крум Ефремов, директор на Директоратот за економска и јавна дипломатија во Министерството за надворешни работи и надворешна трговија на РС Македонија.

Во период од 2019 до 2023 год. беше вонреден и ополномоштен амбасадор на РС Македонија во Украина, од 1999 до 2008 год. беше на раководни позиции во Министерството за трговија и во Министерството за економија, одговорен за економските договори, а од 2005 до 2006 год. беше главен преговарач на Македонија за ЦЕФТА 2006.

Беше последен претседател на работната група за трговија на Пактот за стабилност, активно вклучен во целиот процес на пристапување на Република Северна Македонија во Светската трговска организација.