Стојче Василев, дипломиран правник и консултант за царински формалности. Моментално е ангажиран на Проект на Светска банка за олеснување на транспорт и трговија на Западен Балкан, во компонента за Едношалтерски систем - National Single Window и компонента на ЦЕФТА ДП5 и ДП6 за Овластен економски оператор и Преносливост на социјалните права и отстранување на дозволите за работа. Поседува повеќе од 30 годишно искуство стекнато со ангажмани во Царинската управа и во шпедитерски компании, Фершпед, Соаре, Боми 10 Логистик како раководител на царински и логистички сектори. Преку семејната компанија Бивест, вклучен е во едукација на царински застапници за завршување на испит за царинско застапување во Царинска управа и во проекти за дуално образование и едукација за вработување на ученици и студенти.

Карло Змајшек, поседува повеќе од 30 годишно искуство во делот на шпедитерското работење. Член е на МИФА (Македонската асоцијација на мегународни шпедитери и логистички оператори) од нејзиното основање во 1993 година. Во рамките на разни проекти и унапредување на знаењата има одржано повеќе од 200 интерактивни обуки од надворешно трговското работење, најмногу за Инкотермс. Автор е на книгата „Практичен прирачник за правилата ИНКОТЕРМС 2010“. Долгогодишен член на комисијата за полагање за лиценци за царинските посредици во Царинска управа. Исто е и обучувач во програмата за обука на царинските застапници. Активен директен учесник во секојдневните шпедитерските активности и предизвици во Макпетрол А.Д. каде во моментов работи во Секторот за транспортна логистика.

Проф. д-р Ѓорѓи Филипов, основач на Берин и претседател на Управното тело. Д-р Филипов е професор на Факултетот за информациски науки и компјутерско инжинерство при УКИМ, тој е редовен член на Европската академија за науки и уметности (EASA) со седиште во Салцбург, како и македонски и европски патентен застапник и прв директор на Државниот завод за индустриска сопственост на Македонија. Основач е на Агенцијата за интелектуална сопственост Берин доо Скопје, (1992) и директор на Berin International GmbH -IP Consulting“ Vienna, (2014). Од 2010 – 2014 бил вонреден и ополномоштен амбасадор на Република Македонија во Виена и амбасадор на Македонија во Словачка и Јапонија, а од 2005 до 2010, бил амбасадор во Берлин, Германија. Во 2008, тој беше кандидат на Република Македонија за Генерален директор на Светската организација за интелектуална сопственост (WIPO), во Женева, Швајцарија. Д-р Филипов е Претседател на Советот на амбасадори на МК, а од 2019 до 2022 беше ко-претседавач и координатор на МК делот од Меѓународната група на експерти за трговските марки и комерцијални имиња, формирана според Чл.1.3.ж од Спогодбата од Преспа.

Проф. д-р Јадранка Дабовиќ-Анастасовска од 2023 година е судија во Уставниот суд. Арбитер е во Постојаниот суд – Арбитража при Стопанската комора на Македонија и арбитер во Постојаниот суд – Арбитража при Стопанската комора на Хрватска. Учествувала во изведувањето на наставата на повеќе предметни програми на Правниот факултет „Јустинијан Први“ во Скопје, и тоа: облигационо право, договорно право, договори на автономната трговска практика, право на интелектуална сопственост, право на индустриска сопственост, авторско право, како и основи на правото за проектни менаџери на постдипломските студии по проектен менаџмент на Факултетот за електротехника и информациски технологии и основи на правото на интелектуална сопственост на Машинскиот факултет. Автор е на повеќе универзитетски учебници, монографии и прирачници, како и на повеќе од 100 стручни и научни трудови од областа на приватното право.