Олга Михајлова-Тикваровска е долгогодишен консултант во областа на маркетингот и на менаџментот. Нејзиното искуство вклучува истражувачки и аналитички проекти фокусирани на домашниот и регионалниот пазар и на светските пазари. Олга е автор и/или коавтор на неколку публикации од областа на извозот, дизајнирани како водичи и алатки за компании кои размислуваат за започнување извозни активности. Таа има одржано и серија обуки во сферата на извозот и на извозниот маркетинг.

Како дел од проекти на меѓународни донатори во земјава, работела и на анализи на деловното опкружување. Била и предавач на група предмети од областа на маркетингот на Факултетот за бизнис-економија.  

д-р Кирил Миноски има 25 години професионално меѓународно искуство во развојот на приватниот сектор, финансиите, во управувањето со проекти, институционалниот развој и во креирањето политики, работејќи на високи извршни позиции во приватниот и во јавниот сектор. Тој има работено 13,5 години за една од водечките светски консултантски компании Booz Allen Hamilton на проекти за развој на приватниот сектор, за конкурентност, за подготовка и промоција на извозот, за зајакнување на банкарскиот сектор, за реформи на пазарот на трудот и за воведување проекти за дигитализација на јавниот сектор. Во јавниот сектор тој беше министер за финансии, директор на Управата за јавни приходи, како и директор на Државниот пазарен инспекторат. Како консултант на ЕБРД и на многу други меѓународни проекти финансирани од УСАИД, GIZ и од други меѓународни организации, тој учествуваше во зајакнувањето на МСП и во координацијата на донаторски иницијативи за промоција на извозот.

проф. д-р Анастас Вангели е доцент по меѓународен бизнис на Факултетот за економија и бизнис при Универзитетот во Љубљана. Неговите истражувачки интереси се насочени спрема сегменти на глобализацијата и на глобалните еволуирачки социополитички пејзажи, спремапоследиците од подемот на глобалната Кина, спремадифузијата на идеите низ земјите, како и спрема полињата на практиката и нивните менаџерски последици. Бил гостински научник на Универзитетот во Торино, Италија, на школата за менаџмент ESSCA „Анџерс и Шангај“ и на Европскиот институт за кинески студии – Париз, а има студирано и спроведено истражување во неколку европски земји и во неколкуградови во Кина. Неговата работа е објавена во Critical Perspectives in International Business, Journal of International Business Policy, во Industrial Marketing Management, Journal of Contemporary China, China and World Economy и во други списанија. Тој е вонреден уредник на „Азија–Европа журнал“. Во 2020 година ја доби Наградата за најдобар млад научник од општествените науки, доделена од претседателот на Македонија.

проф. д-р Грегор Пфајфар е вонреден професор во областа на меѓународниот бизнис на Факултетот за економија и бизнис при Универзитетот во Љубљана. Неговата главна област на истражување се фокусира на маркетингот на односи, дигиталната трансформација, на деловните модели, меѓународните динамични маркетинг-способности, како и на соработката за потрошувачка и за спортски маркетинг. Како гостински професор држел предавања на меѓународно високорангирани универзитети во Англија, Канада, Русија, во Полска, Литванија, Естонија и во Хрватска. Бил проект-лидер или член на тим за неколку апликативни проекти од областа на меѓународниот бизнис и маркетинг за избрани мултинационални компании како што се P&G, IBM, BMW, Henkel, Gorenje итн. Неговата работа е објавена во познати научни списанија во Европа и пошироко.