Стопанска комора учествуваше во меѓународно интервју организирано и емитувано од „Клевенард ТВ“, дел од пошироката глобална медиумска платформа за вмрежување „Клевенард“, која е активна на полето на меѓународната бизнис-соработка, претприемништвото, дипломатијата, промоцијата на инвестиции и меѓукултурниот дијалог.

Интервјуто, водено од д-р Леви Мотебеџане под насловот „Економска дипломатија, меѓународна трговска соработка и улогата на стопанските комори во зајакнувањето на глобалните партнерства“, беше посветено на сѐ позначајната улога на стопанските комори во спојувањето на институциите, претпријатијата и меѓународните пазари во сѐ поповрзаната глобална економија.

Во име на Комората, Даниел Матракоски, експерт за меѓународна соработка, ги претстави тековните приоритети и активности на институцијата насочени кон зајакнување на конкурентноста и меѓународното позиционирање на македонските компании.

Во текот на разговорот, економската дипломатија се наметна како централна тема на интервјуто, при што беше ставен акцент на улогата на Комората како „активна платформа за економска дипломатија, меѓународно вмрежување и долгорочен деловен развој“.

Посебно внимание беше посветено на стратешките приоритети на Комората за претстојниот период:

·       образование согласно со потребите на бизнисот,

·       зајакнување на регионалната и меѓународната соработка,

Во таа насока, Матракоски го истакна активното учество на Комората во спроведувањето на дуалното образование и практичната стручна обука, како и тековните активности за воведување учење преку работа во високото образование, со цел подобро усогласување на образовниот систем со потребите на пазарот на трудот.

Беа претставени и опсежните меѓународни активности на Комората, вклучувајќи ја и соработката со бизнис-организациите низ светот, со преку повеќе од 100 потпишани меморандуми за соработка со странски партнерски институции. Дополнителен акцент беше ставен и на улогата на Комората во рамки на регионалните иницијативи како Коморскиот инвестициски форум на шесте комори од Западен Балкан (КИФ ЗБ6) и Асоцијацијата на балкански комори (АКБ), насочени кон унапредување на регионалната економска интеграција и создавање поконкурентен заеднички пазар во Југоисточна Европа.

Осврнувајќи се на инвестициските можности во Македонија, Матракоски ја нагласи стратешката географска положба на земјата вдолж Паневропските коридори 8 и 10, конкурентното деловно опкружување и растечкиот потенцијал во автомобилската индустрија, ИКТ, обновливите извори на енергија, земјоделско-прехранбеното производство, логистиката, туризмот и инфраструктурниот развој. Тој истакна дека автомобилската индустрија денес учествува со речиси половина од вкупниот извоз на државата, додека ИКТ-секторот продолжува да бележи силен годишен раст и трговски суфицит.

Учесниците во дискусијата дополнително се осврнаа на дигиталната трансформација и размената на иновации како клучни двигатели на идната конкурентност. Во тој контекст, учеството на Комората во проектот „ДигитМАК“, кој е софинансиран од ЕУ, беше претставено како пример за напорите за забрзување на дигиталната трансформација преку стратешки партнерства, нови технологии и институционална соработка.

Интервјуто опфати и пошироки глобални економски трендови, регионална интеграција, трансфер на технологии и одржлив развој, вклучувајќи ја и важноста од поддршка на малите и средните претпријатија, зајакнување на меѓуконтиненталните партнерства и справување со депопулацијата и иселувањето од руралните средини преку рамномерен регионален развој и инвестиции во инфраструктура, дигитална поврзаност, туризам и локално претприемништво.

Во заклучокот на интервјуто, Матракоски нагласи дека долгорочниот просперитет сѐ повеќе зависи од стратешката соработка меѓу институциите, претпријатијата и општествата што се способни да ги комбинираат иновациите, одржливоста, конкурентноста и меѓучовечкото поврзување — потврдувајќи ја значајната улога што стопанските комори продолжуваат да ја имаат во зајакнувањето на меѓународните партнерства и економската дипломатија во современата глобална економија.