Народната банка, заедно со другите финансиски регулатори, ја организираше редовната работна средба на регулаторите, приватниот и граѓанскиот сектор за следење на спроведувањето на Стратегијата за финансиска едукација и финансиска инклузија. На средбата, со цел поголема популаризација и користење на медијацијата како една од најдобрите начини за решавање на одреден спор, пред повеќе од 30 присутни, беше одржано предавање на тема: „Медијацијата како алатка за ефикасно и економично решавање на споровите, вклучително и во областа на финансиите“, од страна на д-р Јелисавета Георгиева-Јовевска, претседателка на Асоцијацијата за поддршка на медијацијата при Стопанската комора на Северна Македонија. Искуствата пренесени во оваа презентација се очекува да придонесат за промоција на медијацијата во доменот на финансиските услуги, како начин за поддршка на финансиската инклузија и заштитата на потрошувачите на финансиски производи и услуги во нашата земја.

Средбите кои се одржуваат два пати во текот на годината  овозможуваат  редовен дијалог помеѓу финансиските регулатори, субјектите од приватниот и граѓанскиот сектор вклучени во активностите за финансиска едукација. Размената на предлози и искуства за зајакнување на финансиската инклузија и заштитата на потрошувачите во финансискиот систем, обезбедува  успешно спроведување на Стратегијата за финансиска едукација и финансиска инклузија.Стратегијата за финансиска едукација и финансиска инклузија обезбедува координиран пристап на национално ниво и стратегиска рамка којашто го препознава значењето на едукацијата, овозможува инклузија и координираност на сите релевантни страни и дефинира мапа на активности за ефективно постигнување на целите.