д-р Кирил Миноски има 25 години професионално меѓународно искуство во развојот на приватниот сектор, финансиите, во управувањето со проекти, институционалниот развој и во креирањето политики, работејќи на високи извршни позиции во приватниот и во јавниот сектор. Тој има работено 13,5 години во една од водечките светски консултантски компании Booz Allen Hamilton на проекти за развој на приватниот сектор, за конкурентност, за подготовка и промоција на извозот, за зајакнување на банкарскиот сектор, за реформи на пазарот на трудот и за воведување проекти за дигитализација на јавниот сектор. Во јавниот сектор тој беше министер за финансии, директор на Управата за јавни приходи, како и директор на Државниот пазарен инспекторат. Како консултант на ЕБРД и на многу други меѓународни проекти финансирани од УСАИД, GIZ и од други меѓународни организации, тој учествуваше во зајакнувањето на МСП и во координацијата на донаторски иницијативи за промоција на извозот.

м-р Ева Жонтар е експерт за царински постапки, со богато практично искуство во областа на извозната документација. Како директор на Одделот за јавни документи при Трговско-индустриската комора на Словенија, Ева прави постојан мониторинг на клучните области, како што се правилата за потеклото, привремениот извоз со АТА-карнети и издавањето лиценци, дозволи за меѓународен патен транспорт и други документи кои ја придружуваат стоката за извоз. Покрај тоа што управува со Одделот, таа ги советува компаниите за решавање на сложените предизвици во меѓународниот бизнис, објавува статии во стручни списанија и редовно одржува предавања на професионални семинари и во компании.

На меѓународната сцена таа е активен член на ICC WCF ATA Carnet Administrative Committee (ATAC), World ATA Carnet Council (WATAC) и на Меѓународниот совет за сертификат за потекло при Меѓународната стопанска комора и Царинскиот комитет во Eurochambres. Ева е магистер по меѓународна економија и има завршено национална обука за царинско законодавство.

Стојче Василев, дипломиран правник и консултант за царински формалности. Моментално е ангажиран на проект на Светска банка за олеснување на транспортот и трговијата на Западен Балкан во компонентата за едношалтерски систем – National Single Window – и во компонентата на ЦЕФТА ДП5 и ДП6 за овластен економски оператор, за преносливост на социјалните права и за отстранување на дозволите за работа. Поседува повеќе од 30-годишно искуство добиено со ангажмани во Царинската управа и во шпедитерски компании – „Фершпед“, „Соаре“, „Боми 10 логистик“ – како раководител на царински и на логистички сектори. Преку семејната компанија „Бивест“ е вклучен во едукација на царински застапници за завршување испит за царинско застапување во Царинската управа и во проекти за дуално образование и едукација за вработување ученици и студенти.

Златко Бисковски, лиценциран застапник за застапување во царински постапки – шпедитер – со повеќе од 28 години работно искуство во областа на шпедитерското работење. Бисковски е заменик-директор на Шпедиција во компанијата „Дени интернационал“ Скопје, каде што во изминативе 14 години ја гради својата кариера преку градење експертиза во обезбедувањето услуги за целосно логистичко решение, транспорт, шпедиција, за складирање стоки за привремено чување, складирање стоки за повеќекратно чување, за чување домашни стоки и др.

Офелија Бајо е дипломиран правник со правосуден испит. Работела во Царинската управа, каде што има 21-годишно искуство, а од почетокот на својата кариера во Царинската управа работи во повеќе сектори. Фокусот на својата работа го става врз царинските постапки, нивното поедноставување и врз олеснувањето на трговијата. Учествува во повеќе проекти во рамките на Царинската управа, а еден од позначајните е воведувањето на системот за електронска обработка на декларации и акцизни документи, како негов проектен менаџер. Во текот на кариерата ангажирана е како учесник на повеќе домашни и меѓународни семинари и конференции од областа на царинските постапки. Својата кариера ја продолжува како оперативен менаџер во „Ред шпед“ ДООЕЛ, компанија со основна дејност шпедиција, транспорт и складирање, како и давање консултантски услуги.