Како и секогаш и сега проблемите дојдоа неочекувано. За неупатените. После толку кризи (економска, финансиска, здравствена, енергетска), човек да мисли дека нема да дојде до ова, треба да е многу наивен. И сега, сите во кавга и пак бизнисот ќе ја плати сметката. Прашање е само до кога вака. На терен работите стојат вака: на глобално ниво не сум сигурен колку луѓе знаат што се случува, Европа е фатена на спиење, балканскиот регион вечно дебатира. Резултатот е следен. Во КИФ едвај успеавме да ги собереме на едно место сите членови на Управниот одбор, европските дипломати трчаат на сите страни, балканските лидери почнаа да се изјаснуваат, кај нас бизнисот бара уште пари...... Се на се` веќе познато сценарио за отворање на проблемите. Но, Комората не запира, си ја остварува својата улога согласно законите, продолжува да ги поддржува фирмите, дава нови иницијативи, дебатира, промовира книги, кадровски се екипира, им помага на компаниите за нивно излегување надвор од границите. За коморската поддршка на компаниите и преку конкретни примери:

-        осум фирми од Македонија, во организација на Клубот на извозници се промовираат на саемот за храна во Атина, Р. Грција;

-        во Словенија ќе се надградуваат капацитетите за одржлив туризам преку согледување на словенечкиот систем со можност да се применат успешни практики и во македонските туристички дестинации со понуда на одржливи производи и практики;

-        во Белград Коморите од Западен Балкан разговараа и дефинираа приоритетни активности од значење за бизнисот кои треба да бидат поддржани преку продолжување на досегашниот проект со Европската комисија кој се однесува на заедничкиот регионален пазар;

-        на 27 март 2025 година Управниот одбор на КИФ и компании од Бизнис советот (од сите земји на Западен Балкан), ќе имаат состанок во Брисел со еврокомесарката за проширување Марта Кос. Од состанокот се очекува фирмите членки на Бизнис советот да ги споделат своите мислења за регионалната бизнис интеграција и предизвиците со кои се соочуваат за заеднички регионален пазар и поблиската интеграција со единствениот пазар на ЕУ. Фокусот ќе биде ставен на трговијата со стоки и услуги, инвестиции и пристап до финансии, и пристапот до зелена транзиција.

А дека Комората работи континуирано и активно, говорат сликите во продолжение за само дел од настаните реализирани во двата месеци од почетокот на оваа година. За секоја од нив и мало образложение на крајот од текстот.